ಬೆಂಗಳೂರು: ಎಲ್ಲಾ ಸ್ಟಾರ್ ನಟರು ಬೃಹತ್ ಮಾಸ್ ಕಥೆಗಳುಳ್ಳ ಪ್ಯಾನ್ ಇಂಡಿಯಾ ಸಿನಿಮಾಗಳತ್ತ ಮುಖ ಮಾಡುತ್ತಿರುವ ಈ ಹೊತ್ತಿನಲ್ಲಿ, ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ಅವರು ತೀರಾ ಭಿನ್ನ ಮತ್ತು ಸವಾಲಿನ ಪಾತ್ರವೊಂದನ್ನು ಒಪ್ಪಿಕೊಳ್ಳುವ ಮೂಲಕ ಮತ್ತೆ ತಮ್ಮ “ನಟ”ತ್ವವನ್ನು ಸಾಬೀತುಪಡಿಸಿದ್ದಾರೆ. ಈಗ ಬಡಜನರ ನಾಯಕ ಎಂದೇ ಕರೆಸಿಕೊಂಡಿದ್ದ, ಕನಿಷ್ಠ ಸೌಲಭ್ಯಗಳಲ್ಲೇ ಬದುಕುತ್ತಿರುವ, ತೆಲುಗುನಾಡಿನ ಕ್ರಾಂತಿಕಾರಿ ರಾಜಕಾರಣಿ ಗುಮ್ಮಡಿ ನರಸಯ್ಯ ಅವರ ಪಾತ್ರದಲ್ಲಿ ಶಿವಣ್ಣ ನಟಿಸುತ್ತಿದ್ದಾರೆ. ಈ ಬಯೋಪಿಕ್‌ನ ಟೈಟಲ್ ಪೋಸ್ಟರ್ ಬಿಡುಗಡೆಯಾಗಿದ್ದು, ಭಾರಿ ಕುತೂಹಲ ಮೂಡಿಸಿದೆ.
ಬಡವರ ಕ್ರಾಂತಿಕಾರಿ ನಾಯಕನ ಕಥೆ:
ಇಂದು ಸಣ್ಣ ಪುಟ್ಟ ನಟರೂ ಸಹ ಮಾಸ್ ಮತ್ತು ಗ್ಲಾಮರ್ ಸಿನಿಮಾಗಳ ಹಿಂದೆ ಬಿದ್ದಿರುವಾಗ, 60ರ ವಯಸ್ಸಿನಲ್ಲೂ ವಿಭಿನ್ನ ಪಾತ್ರಗಳನ್ನು ಆಯ್ದುಕೊಳ್ಳುವ ಶಿವಣ್ಣನ ನಿರ್ಧಾರ ಮೆಚ್ಚುವಂತದ್ದು. ಇದೀಗ ಅವರು ಕೈಗೆತ್ತಿಕೊಂಡಿರುವ ‘ಗುಮ್ಮಡಿ ನರಸಯ್ಯ’ ಪಾತ್ರ, ತೆಲುಗು ರಾಜಕಾರಣದಲ್ಲಿ ಒಂದು ಅದ್ಭುತ ಅಧ್ಯಾಯ.
ಯಾರು ಈ ಗುಮ್ಮಡಿ ನರಸಯ್ಯ?
ಗುಮ್ಮಡಿ ನರಸಯ್ಯ ಅವರು ತೆಲುಗು ರಾಜ್ಯಗಳಲ್ಲಿ (ಈಗಿನ ತೆಲಂಗಾಣ) ಅತ್ಯಂತ ಜನಪ್ರಿಯರಾದ ಮಾಜಿ ಶಾಸಕ ಮತ್ತು ಹೋರಾಟಗಾರ. ಇವರು ತಮ್ಮ ಜೀವನವನ್ನೇ ಜನಸೇವೆಗೆ ಮೀಸಲಿಟ್ಟವರು.
- ರಾಜಕೀಯ ಪಯಣ: ಇವರು ಈಗಿನ ತೆಲಂಗಾಣ ರಾಜ್ಯಕ್ಕೆ ಸೇರಿರುವ ಖಮ್ಮಂ ಜಿಲ್ಲೆಯ ಇಲ್ಲಂದು ಕ್ಷೇತ್ರದಿಂದ ಬರೋಬ್ಬರಿ ಐದು ಬಾರಿ ಶಾಸಕರಾಗಿ ಆಯ್ಕೆಯಾದವರು. ಇವರು ಸಿಪಿಐ (ಎಂಎಲ್-ನ್ಯೂ ಡೆಮಾಕ್ರಸಿ) ಪಕ್ಷಕ್ಕೆ ಸೇರಿದವರು.
- ಸರಳತೆಯೇ ಆಸ್ತಿ: ನರಸಯ್ಯ ಅವರು ತಮ್ಮ ಸೇವೆಯ ಜೊತೆಗೆ ತಮ್ಮ ಅಸಾಮಾನ್ಯ ಸರಳತೆಯಿಂದಲೇ ಮನೆ ಮಾತಾಗಿದ್ದಾರೆ. ಶಾಸಕರಾಗಿದ್ದಾಗ ಕೂಡ ಅವರು ವಿಧಾನಸಭೆಯಲ್ಲಿ ಪಾಲ್ಗೊಳ್ಳಲು ಆರಂಭದಲ್ಲಿ ಕಾಲ್ನಡಿಗೆಯಲ್ಲೇ ಹೈದರಾಬಾದ್ಗೆ ಬರುತ್ತಿದ್ದರು. ನಂತರದಲ್ಲಿ ಸೈಕಲ್ ಖರೀದಿಸಿ, ಅದರಲ್ಲೇ ಅಸೆಂಬ್ಲಿಗೆ ತೆರಳುತ್ತಿದ್ದರು.
- ತ್ಯಾಗಮಯಿ: ಶಾಸಕರಾಗಿ ಬಂದ ಸಂಪೂರ್ಣ ಸಂಬಳವನ್ನು ತಮ್ಮ ಪಕ್ಷಕ್ಕೆ ನೀಡುತ್ತಿದ್ದ ಇವರು, ತಮ್ಮ ಜೀವಿತಾವಧಿಯಲ್ಲಿ ಒಂದು ಇಂಚು ಆಸ್ತಿಯನ್ನೂ ಖರೀದಿಸಲಿಲ್ಲ. ಈಗಲೂ ಅವರ ಬ್ಯಾಂಕ್ ಖಾತೆಯಲ್ಲಿ ಯಾವುದೇ ಹಣವಿಲ್ಲ. ಆದರೆ, ಕೋಟ್ಯಂತರ ಜನರ ಪ್ರೀತಿ ಮತ್ತು ಗೌರವವನ್ನು ಅವರು ಸಂಪಾದಿಸಿದ್ದಾರೆ.
- ಪತ್ನಿಯ ಶ್ರಮ: ಗುಮ್ಮಡಿ ನರಸಯ್ಯ ಶಾಸಕರಾದರೂ, ಅವರ ಪತ್ನಿ ಮಾತ್ರ ತಮ್ಮ ಸರಳ ಬದುಕನ್ನು ಬಿಡಲಿಲ್ಲ. ಅವರು ಎಂದಿನಂತೆ ಸೌದೆ ಮಾರುವ ಮತ್ತು ಸಗಣಿ ಬೆರಣಿಗಳನ್ನು ತಲೆ ಮೇಲೆ ಹೊತ್ತು ಊರುಗಳಿಗೆ ಹೋಗಿ ಮಾರಾಟ ಮಾಡುವ ಕಾಯಕವನ್ನು ಮುಂದುವರೆಸಿದ್ದರು.
ಪೋಸ್ಟರ್ ಬಿಡುಗಡೆ:
ಈ ಮಹಾನ್ ನಾಯಕನ ಜೀವನ ಕಥೆಯನ್ನು ಈಗ ಸಿನಿಮಾ ಮಾಡಲಾಗುತ್ತಿದ್ದು, ಶಿವರಾಜ್ ಕುಮಾರ್ ಅವರು ಗುಮ್ಮಡಿ ನರಸಯ್ಯನ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಬಿಡುಗಡೆಯಾದ ಪೋಸ್ಟರ್‌ನಲ್ಲಿ ಶಿವಣ್ಣ ಅವರು, ಸಿಪಿಐ ಬಾವುಟವನ್ನು ಕಟ್ಟಿದ ಸೈಕಲ್ ಅನ್ನು ತಳ್ಳಿಕೊಂಡು ಅಸೆಂಬ್ಲಿಗೆ ಹೋಗುತ್ತಿರುವ ಚಿತ್ರವಿದೆ. ಇದು ನರಸಯ್ಯನವರ ಸರಳ ರಾಜಕೀಯ ಜೀವನಕ್ಕೆ ಹಿಡಿದ ಕೈಗನ್ನಡಿಯಂತಿದೆ.
ಎನ್ ಟಿ ಆರ್ ಅಲೆಯಲ್ಲೂ ಗೆದ್ದ ಬರಿಗೈ ಮಾಲೀಕ:
ಗುಮ್ಮಡಿ ನರಸಯ್ಯ ಅವರ ರಾಜಕೀಯ ಶಕ್ತಿಯನ್ನು ಅರಿಯಲು ಒಂದು ಘಟನೆ ಸಾಕು. 1983 ರಲ್ಲಿ ತೆಲುಗು ಚಿತ್ರರಂಗದ ದಂತಕಥೆ ಎನ್ ಟಿ ರಾಮರಾವ್ ಅವರು ರಾಜಕೀಯಕ್ಕೆ ಧುಮುಕಿದಾಗ ಇಡೀ ಆಂಧ್ರದಲ್ಲಿ ಎನ್ ಟಿ ಆರ್ ಅಲೆ ಎದ್ದಿತ್ತು. ಅವರ ಪಕ್ಷದ 202 ಅಭ್ಯರ್ಥಿಗಳು ಗೆದ್ದಿದ್ದರು. ಇಡೀ ರಾಜ್ಯದಲ್ಲಿ ಈ ಪ್ರಬಲ ಅಲೆ ಇದ್ದಾಗಲೂ, ಯಾವುದೇ ಆಸ್ತಿ ಇಲ್ಲದ ಬರಿಗೈ ಮಾಲೀಕ ಗುಮ್ಮಡಿ ನರಸಯ್ಯ ಅವರು ಗೆದ್ದು ಬಂದಿದ್ದರು. ಜನರೇ ಹಣ ಹಾಕಿ ಅವರನ್ನು ಚುನಾವಣೆಗೆ ನಿಲ್ಲಿಸಿ ಗೆಲ್ಲಿಸಿ ಕಳಿಸುತ್ತಿದ್ದರು.
2009ರಲ್ಲಿ ಅವಿಭಜಿತ ಆಂಧ್ರ ಒಡೆದು, ಇಲ್ಲಂದು ಕ್ಷೇತ್ರದ ವಿಭಜನೆಯಾದ ಬಳಿಕ ಗುಮ್ಮಡಿ ನರಸಯ್ಯ ಗೆಲ್ಲಲಿಲ್ಲವಾದರೂ, ಅವರು ಈಗಲೂ ತಮ್ಮ ಕ್ಷೇತ್ರದಲ್ಲಿ ಸಕ್ರಿಯರಾಗಿದ್ದಾರೆ. ಜನ ಅವರನ್ನು ಈಗಲೂ ಪ್ರೀತಿಯಿಂದ “ಶಾಸಕ” ಎಂದೇ ಕರೆಯುತ್ತಾರೆ.
ಪ್ಯಾನ್ ಇಂಡಿಯಾ ಚಿತ್ರವಾಗಿ ಗುಮ್ಮಡಿ ನರಸಯ್ಯ:
ಈ ಮಹನೀಯ ರಾಜಕಾರಣಿಯ ಕುರಿತ ಸಿನಿಮಾ ತೆಲುಗಿನ ಪ್ಯಾನ್ ಇಂಡಿಯಾ ಚಿತ್ರವಾಗಿ ತಯಾರಾಗುತ್ತಿದೆ. ಇದು ತೆಲುಗು, ಕನ್ನಡ, ತಮಿಳು, ಮಲಯಾಳಂ ಹಾಗೂ ಹಿಂದಿ ಭಾಷೆಗಳಲ್ಲಿ ನಿರ್ಮಾಣಗೊಳ್ಳಲಿದೆ.
ತಂಡದ ವಿವರ: - ನಿರ್ಮಾಣ: ಎನ್ ಸುರೇಶ್ ರೆಡ್ಡಿ
- ನಿರ್ದೇಶನ: ಪರಮೇಶ್ವರ್ ಹಿವರಾಲೆ
ಶಿವಣ್ಣ ಅವರಂತಹ ಅನುಭವಿ ನಟನ ಆಯ್ಕೆ ಮತ್ತು ಗುಮ್ಮಡಿ ನರಸಯ್ಯ ಅವರಂತಹ ಕ್ರಾಂತಿಕಾರಿ ನಾಯಕನ ಕಥೆ, ಈ ಸಿನಿಮಾದ ಬಗ್ಗೆ ಭಾರೀ ನಿರೀಕ್ಷೆಗಳನ್ನು ಹುಟ್ಟುಹಾಕಿದೆ.
About The Author
