ಕೊಪ್ಪಳ: ಜಿಲ್ಲೆಯ ಕುಕನೂರು ತಾಲೂಕಿನ ಬೆಣಕಲ್ ಗ್ರಾಮದಲ್ಲಿ ಇಬ್ಬರು ಪುಟ್ಟ ಮಕ್ಕಳಿಗೆ ನೇಣು ಬಿಗಿದು ತಾಯಿಯೊಬ್ಬರು ಆತ್ಮಹತ್ಯೆಗೆ ಶರಣಾದ ಮನಕಲಕುವ ಘಟನೆ ನಡೆದಿದೆ. ಈ ದುರಂತ ಘಟನೆಯು ಸ್ಥಳೀಯರಲ್ಲಿ ತೀವ್ರ ಆಘಾತ ಮೂಡಿಸಿದೆ.
ಮನೆ ಕೆಲಸಕ್ಕೆ ಹೋಗಿದ್ದಾಗ ದುರಂತ
ಮೃತರನ್ನು ಲಕ್ಷ್ಮವ್ವ ಹನುಮಪ್ಪ ಭಜಂತ್ರಿ (30), ಹಾಗೂ ಆಕೆಯ ಮಕ್ಕಳಾದ ರಮೇಶ (4) ಮತ್ತು ಜಾನ್ವಿ (2) ಎಂದು ಗುರುತಿಸಲಾಗಿದೆ.
- ಲಕ್ಷ್ಮವ್ವ ಅವರು ತನ್ನ ಇಬ್ಬರು ಮಕ್ಕಳಿಗೆ ಮೊದಲು ನೇಣು ಬಿಗಿದು ಕೊಲೆ ಮಾಡಿ, ನಂತರ ತಾವೂ ನೇಣಿಗೆ ಶರಣಾಗಿದ್ದಾರೆ ಎಂದು ಸ್ಥಳೀಯರು ಮತ್ತು ಪೊಲೀಸರು ಶಂಕಿಸಿದ್ದಾರೆ.
- ಘಟನೆ ನಡೆದಾಗ ಲಕ್ಷ್ಮವ್ವ ಅವರ ಪತಿ ಹನುಮಪ್ಪ ಹಾಗೂ ಅತ್ತೆಯವರು ಕೂಲಿ ಕೆಲಸಕ್ಕಾಗಿ ಮನೆಯಿಂದ ಹೊರಗೆ ಹೋಗಿದ್ದರು ಎನ್ನಲಾಗಿದೆ.
- ಲಕ್ಷ್ಮವ್ವ ಮತ್ತು ಹನುಮಪ್ಪ ಅವರ ಮದುವೆ 2016 ರಲ್ಲಿ ನಡೆದಿತ್ತು. ಪತಿ ಕಟ್ಟಡ ಕಾರ್ಮಿಕನಾಗಿದ್ದು, ಕರ್ಕಿಹಳ್ಳಿ ಗ್ರಾಮದವರಾದರೂ ಪತ್ನಿ ಮನೆಯಾದ ಬೆಣಕಲ್‌ನಲ್ಲೇ ವಾಸವಾಗಿದ್ದರು.
ಪತಿ ಹನುಮಂತಪ್ಪ ಅವರು ಘಟನೆ ಬಗ್ಗೆ ಪ್ರತಿಕ್ರಿಯಿಸಿದ್ದು, “ನಮ್ಮಲ್ಲಿ ಯಾವುದೇ ಜಗಳ ಇರಲಿಲ್ಲ, ಯಾವುದೇ ತೊಂದರೆ ಇರಲಿಲ್ಲ,” ಎಂದಿದ್ದಾರೆ.
ಮಹಿಳೆಯ ಕೈ ಬಳೆಯಲ್ಲಿ ‘ಡೆತ್ ನೋಟ್’ ಪತ್ತೆ ಶಂಕೆ
ಮಹಿಳೆ ಆತ್ಮಹತ್ಯೆಗೆ ನಿರ್ದಿಷ್ಟ ಕಾರಣವೇನು ಎಂಬುದು ಇನ್ನೂ ತಿಳಿದುಬಂದಿಲ್ಲ. ಆದರೆ, ಮೃತ ಲಕ್ಷ್ಮವ್ವ ಅವರ ಕೈ ಬಳೆಯಲ್ಲಿ ಒಂದು ಚೀಟಿ (ಡೆತ್ ನೋಟ್) ಪತ್ತೆಯಾಗಿದ್ದು, ಇದರಲ್ಲಿ ಸಾವಿಗೆ ಕಾರಣ ಬರೆದಿರುವ ಸಾಧ್ಯತೆ ಇದೆ ಎಂದು ಪೊಲೀಸರು ಶಂಕಿಸಿದ್ದಾರೆ. ಈ ಚೀಟಿಯ ಬಗ್ಗೆ ತನಿಖೆ ಮುಂದುವರೆದಿದೆ.
ಘಟನೆಯ ಮಾಹಿತಿ ತಿಳಿಯುತ್ತಿದ್ದಂತೆಯೇ ಕೊಪ್ಪಳ ಎಸ್ಪಿ ಡಾ.ರಾಮ್ ಎಲ್ ಅರಸಿದ್ದಿ ಅವರು ಸ್ಥಳಕ್ಕೆ ಭೇಟಿ ನೀಡಿ, ಪರಿಶೀಲನೆ ನಡೆಸಿದ್ದಾರೆ. ಈ ಸಂಬಂಧ ಕುಕನೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
(ಸೂಚನೆ: ಆತ್ಮಹತ್ಯೆ ಯಾವುದೇ ಸಮಸ್ಯೆಗೆ ಪರಿಹಾರವಲ್ಲ. ಮಾನಸಿಕ ಒತ್ತಡ ಅಥವಾ ತೊಂದರೆಯಿಂದ ಬಳಲುತ್ತಿರುವವರು ದಯವಿಟ್ಟು ಸಹಾಯವಾಣಿ ಸಂಪರ್ಕಿಸಿ. ಆರೋಗ್ಯವೇ ಭಾಗ್ಯ – ಕರ್ನಾಟಕ ಆರೋಗ್ಯ ಸಹಾಯವಾಣಿ: 104)